ਕਵਿਤਾ/ਨਜ਼ਮ

ਕੀ ਏ ਸੱਭਿਆਚਾਰ ਪੰਜਾਬੀ?

ਕੀ ਹੁੰਦਾ ਪੰਜਾਬ ਏ ਸੱਜਣਾ, ਕਿਸਨੂੰ ਕਹਿੰਦੇ ਅਣਖ ਪੰਜਾਬੀ?
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 

ਜਨਮ ਲਿਆ ਭਾਵੇਂ ਏਸ ਭੋਇੰ ‘ਤੇ, ਪੰਜਾਬ ਦੀ ਖ਼ੁਸ਼ਬੂ ਰੋਇੰ-ਰੋਇੰ ‘ਤੇ,
ਲਿਖਣ ‘ਤੇ ਬੋਲਣ ਠੇਠ ਮਾਂ-ਬੋਲੀ, ਭੁੱਲਦੇ ਨਹੀਂ ਸਤਿਕਾਰ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 

ਪਹਿਚਾਣ ਪਹਿਰਾਵੇ ਦੀ ਨੂੰ ਗੁੜ੍ਹਤਾ , ਸਲਵਾਰ-ਕਮੀਜ਼, ਪਜਾਮਾ-ਕੁੜਤਾ 
ਤੁਰ੍ਹਲੇ ਵਾਲੀ ਪੱਗ ਵੀ ਬੰਨ੍ਹਦੇ, ਕਦੇ-ਕਦੇ ‘ਸ਼ਾਹਕਾਰ’ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 
ਕਿਸੇ ਅਹਿਮਦ ਸ਼ਾਹ ਤੋਂ ਕਦੇ ਨਾ ਡਰਦੇ, ਖਾਣ-ਪੀਣ ਦਾ ਲਾਹਾ ਕਰਦੇ,
ਰੋਟੀ ਮਿੱਸੀ ਸਾਗ ਸਰੋਂ ਦਾ, ਬਣ ਮੱਖਣਾਂ ਸ਼ਿੰਗਾਰ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 

ਸੁਭਾਅ ਦੇ ਖੁੱਲੇ, ਸ਼ਾਹੀ ਬਹਿਣੀ, ਉੱਚੀ ਸੋਚ ‘ਤੇ ਸਾਦੀ ਰਹਿਣੀ,
ਰਿਸ਼ਤਿਆਂ ‘ਤੇ ਮੋਹ ਡੁੱਲ-ਡੁੱਲ ਪੈਂਦਾ, ਯਾਰਾਂ ਦੇ ਨੇ ਯਾਰ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 

ਕਬੱਡੀ, ਹਾਕੀ, ਜੰਗ-ਪਲੰਗਾ, ਛੂਹਣ-ਛੁਹਾਈ ‘ਤੇ ਗੁੱਲੀ-ਡੰਡਾ,
ਲੱਕ-ਭੰਨਣ ‘ਤੇ ਬੰਟੇ ਖੇਡਣ, ਦੌੜਨ ਨਜ਼ਰਾਂ ਦੀ ਰਫਤਾਰ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 

ਦਸਾਂ ਗੁਰਾਂ ਦੀ ਸਿੱਖਿਆ ਮੇਵੇ, ਔਖੀ ਘੜੀ ਨਾ ਦੇਖਣ ਦੇਵੇ,
ਜੁਲਮ ਨਾ ਕਰਨਾ, ਨਾਹੀਂ ਸਹਿਣਾ, ਚੁੱਕ ਲੈਣੀ ਤਲਵਾਰ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?

 

ਗੁਰ-ਪੀਰਾਂ ਦੀ ਧਰਤੀ ਲੱਗੀਆਂ, ਜੜ੍ਹਾਂ ਨਾ ਭੁੱਲਦੇ ਮੂਲੋਂ ਸਗੀਆਂ,
ਇਸ ਧਰਤੀ ‘ਤੇ ਕੀਮਤ-ਕਦਰਾਂ, ਮਾਣਨਗੇ ਤਿਉਹਾਰ ਪੰਜਾਬੀ।
ਐਸ਼ਲੀਨ, ਮਨਮੀਤ ਤੋਂ ਪੁੱਛੋ, ਕੀ ਏ ਸੱਭਿਆਚਾਰ ਪੰਜਾਬੀ?


ਭੂਪਿੰਦਰ ਨਿਊਯਾਰਕ।